Dag 60. Woensdag 19 Maart
Moeksie is al net na ses op en was skottelgoed. My koffie staan reg toe ek opstaan en die nuwe dag groet. Dis sonskyn en windstil. Ons gesels oor die volgende stop en besef dis amper skoolvakansie wat kampplekke skaars kan maak. Nadat ons besluit het op T.O. Strand as ons volgende stop, bel ek hulle en bespreek vir 3 nagte.
Na ons vrugte en jogurt ry ons na Double Mouth, Haga Haga en wou ook by Bosbokstrand ingaan maar hulle is net vakansies oop en moes by die hek met die slot omdraai. ʼn Jammerte want ek wou graag die plek sien, het gehoor dis ʼn vakansie paradys. Ons waardeer die ongereptheid van hierdie deel van ons kus en wonder vir hoe lank dit nog so gaan wees.
Ons stop op Kei Mond en drink ʼn bier en wyn by een van die lokale Pub & Restaurante. Dis altyd lekker om met die plaaslike mense te gesels, die plek se geskiedenis te hoor en ook hulle eie stories te hoor. Dis hier waar jy soms goeie inligting kry oor toekomstige kampplekke en besienswaardighede.
Terug by die kamp het die wind effe opgekom, net genoeg vir my kite. Ek het ʼn 2,8sqm power kite wat ek baie geniet, veral as die wind bietjie stoot en my oor die sand sleep. Vandag is die wind lekker, nie te sterk nie want hy kou jou arms. Ek speel lekker met die Staffie wat heeltyd agter die kite aan hardloop as ek hom laag oor die strand vlieg.
Die vuur word aangesteek, vanaand is lamtjops en groente, sou maklik die groente vir ʼn braaibroodjie wou ruil maar ek dink Moeksie is bang ek kry skeerbuik. Dis rustig om so oor die vuur na die see te sit en staar, besig met jou eie gedagtes wat jy soms uitspreek soos “ek verlang na my kleinkind” of “my kinders sal hierdie geniet”.
Die aandete is vyfster en my uitdrukking “nou kamp ons lekker” word herhaaldelik ge-uiter. Dis was weer ʼn ongelooflike dag.
Ons het Desember in Bosbokstrand vakansie gehou. Pragtige plek! En geen dagbesoekers. Ablusie is pragtig skoon en staanplekker het baie gras. Ons Fortuner (2×4) en gewone karavaan het net nie so baie van die grondpad soontoe gehou nie… 😉