Dag 43

Dag 43. Sondag 2 Maart

Ons het gisteraand om die kampvuur besluit om vanoggend almal by een van die restaurante by die hawe ontbyt te gaan eet en eers daarna te kom kamp afslaan. Anton het vir Frans en Yvonne, ook ʼn oud kollega en vriend wat op Onrus kom aftree het, genooi om by ons te kom aansluit vir ontbyt.

Die wind waai onplesierig as Frans en Yvonne reeds vir ons sit en wag by die restaurant. Ons groet en hulle wil die hele verhaal hoor. Ons deel ons stories en gesels oor “daardie” dae – Frans was saam met Anton ʼn Streekbestuurder vir ʼn aantal jare en ook my baas. Dis lekker om net te sit, jou bestelling te plaas, lekker te eet, gesels en dan op te staan sodat ander mense die skottelgoed kan was. Die ontbyt hier by die restaurant was ʼn goeie voorstel.

Die oppak in die sterk wind is ʼn uitdaging maar ons vorder goed. Ons gaan ook vandag verder, weet nog nie waarheen nie. Almal betuig groot dank vir die reëlings om almal saam te genooi het vir die kamp en elkeen vat pad in sy eie rigting, ons en Anton-hulle deur Hermanus, en Stanford na Struisbaai. Na ʼn paar draaie ry ons Arniston toe, wil graag daar gaan kamp en die Waenhuiskrans Natuurreservaat gaan besoek en ervaar. Het al baie en mooi foto’s van die bekende grot gesien, wil dit ook gaan afneem.

Dis Sondag middag en daar is nie ʼn siel by die ontvangs van die kampterrein nie, dis gesluit. Gelukkig is die boom nie toe nie en ons ry deur na die kampplekke. Dis vreemd om die kampplek so te sien, net twee ander kampers in die hele terrein. Ek en Moeksie wou al een Desember hier kamp toe ons hier verby is maar kon nie plek kry vir een nag nie, hy was vol en ons moes op die grasperk van goeie kennisse en oud kolega van Moeksie (Nantes en Kiewiet) se vakansiehuis in Struisbaai kamp opslaan. Ook ʼn lekker kuier gewees.

Die windjie roer nog en ons slaan kamp op aan die Suidekant van die terrein, langs die sandwal wat met bome beplant is en beskutting bied en ook lekker naby die ablusie.

Na die opslaan ry ons ʼn draai en is beïndruk met Kassiesbaai, die huisies en eetplekkies wat netjies in stand gehou word en almal wat vriendelik groet as jy verbyry. Ons stop by die hotel en drink ʼn lekker koue bier op die stoep. 

Ons steek ʼn vuurtjie aan en gaan geniet die warm storte in die netjiese en skoon ablusie. Ons braai vroeg, wil na gisteraand se kuier ʼn bietjie vroeër in die bed kom. Dit was ʼn BESIGE naweek en ons geniet die rustigheid as ons om die vuurtjie kuier. Ek en Moeksie geniet ons nuwe stoele.

  • Hierdie lekkerlees vertellinge is n groot lekkerte om elke dag te lees. Ek en my man geniet dit BAIE, soveel so dat hy met die padkaart sit om presies te sien waar is al die kamp plekke. Alhoewel hy in die Kaap groot geword het, is dit vir ons baie interessant om te weet waar al die kampplekke is. Ons sal ook baie graag so n toer wil doen binne n jaar of so. Nie baie tyd oor om dit aan te pak nie en moet ons die regte vriende kry om dit mee saam te doen. Manlief is in sy middel 70tigs maar darem nog fiks en gesond. Ons sal net n mover aan ons ou Jurgens Explorer karavaan moet aanbring want die karavaan raak net te swaar vir ons twee om te stoot. So het ons agter gekom toe ons in 2017 alleen deur Namibië getoer het.

  • Leave a reply