Dag 10, 11 & 12

Saterdag 30 April 2022

ROETE : C27, C19, C14, B2 Alte Brücke= 347 km

Dis net voor sewe as die son sy kop wil uitsteek. Moeksie sit al buite en lees as ek die opkoms op kamera vasvang.

Dis net na nege as ons die grootpad vat. Hierdie eerste 12 km van die C27 tot by die aansluiting met die C19 is teerpad en dit gaan vinnig. Het hom al gery toe hy nog grondpad was, jou tande behoorlik stukkend geskut ! Ons draai links op die C19 en vat pad na Solitaire wat ongeveer 70 km verder is. Die pad is mooi en ons ry goed.

Ons draai net na half elf in by Solitaire, moet eers (soos altyd) n ietsie hier eet. Hulle is veral bekend vir hulle lekker appeltert, beslis die moeite werd. Die bordjie wat die reënval van die afgelope klompie jare aandui vertel n storie, veral as jy kyk na die eerste drie maande van 2022, reeds 212 mm gemeet.

Van hier af is dit net onder die 50 km tot by Rostock Ritz en dis net na 12 as ons by die bordjie afdraai. Die Lodge is amper 7 km van die grootpad af, maar die pad is goed. By die Lodge word ons hartlik verwelkom en die vrou sê sy het ons nie so vroeg verwag nie. Dis as ek haar vertel dat ons nie bespreek het nie en net slaapplek soek vir een aand dat haar oë rek. Sy verwag n groep van 26 mense wat die hele kampplek bespreek het, kan ons ongelukkig nie help nie. Die enigste kampplek verder aan is Valley Of a Thousand Hills, so ongeveer 30 km met die C14 aan en dan regs op die C26 vir so 8 km tot by die afdraai na die Lodge. Tyd begin n faktor raak en ons is haastig weer terug grootpad toe.

Dis as ons al n ent weg is dat ek vir Moeksie sê ek moes die vrou gevra het om te bel, wat as hulle ook nie plek het nie. Ons kan self nie bel nie, hier is nie sein nie. Sal dan maar deurry Swakop toe, sal voor donker daar aankom. As ons by die afdraai kom en inry moet ons dit maar stadig vat op die tweespoor paadjie deur die heuwels. Die landskap is mooi ! Hier staan n groot Unimog langs die pad en ek verneem of als reg is. Die buitelander sê als is ok, maak net gou iets op die trok reg. 

Ons kom tot naby die Lodge en ek sien die steil paadjie wat oploop tot bo by die Lodge. Bang daar is nie omdraai plek nie en ek en Moeksie stap boontoe. Die ongelooflikste uitsig van hier bo af oor die heuwels. Die vrou sê sy het net drie staanplekke en al drie is bespreek. Terug by die bakkie sê Ewald hy het gaan kyk na die kampplekke, sal nooit met sy karavaan daar kon ingaan nie. Nou is dit terugry tot by die C14 en dan die ongeveer 200 km tot in Swakopmund. Die GPS sê ons behoort voor vyf daar te wees.

Dis in een van die draaie op die Kuiseb pas dat my oog die oop klerelaai van die waentjie sien. Ek wonder hoe lank ek al met hom so ry, want hier konsentreer jy op die pad en kyk min terug. Is daar nog iets oor in die laai ?? As ek n veilige aftrekplek soek vra ek vir Moeksie of sy die laaie gesluit het en sy verseker my sy het. Ek is dadelik op die radio en sê vir Ewald hy moet in die pad kyk vir klere, die laai het oopgegaan. Hy sê hulle is by een of twee verby maar hy sal omdraai en gaan optel. Intussen is daar al n paar voertuie van voor en agter af by ons verby.

As ek by die laai kom sien ek daar is nog baie van Moeksie se klere in die laai, netjies stewig in houertjies gevou. Dis as ek die laai wil toemaak dat ek sien albei die knippe wat hom toemaak het, het gebreek. Ek kry n ratchet strap uit en prakseer n manier om die laai toe te hou. As Ewald by ons stop sê hy iemand moes dit wat hy gesien het opgetel het, n swart baadjie. Moeksie bevestig dis haar reënbaadjie. Ons kan nie tyd mors nie en moet ry, Moeksie sal maar in Swakop kyk wat is als weg.

So 20 km verder is die laai weer oop, hom gelukkig hierdie keer gou sien oopgaan toe twee kledingstukke deur die lug waai. Ek tel die klere op en maak hierdie keer seker hy sal nie weer oopgaan nie. Die Kuiseb pas en Kuiseb Canyon is besonder mooi en ons verwonder ons aan die omgewing. Het n vorige keer hier zebra en springbokke gesien.

Na die passe kom ons onder op die “woestynpad” soos ek hom noem. Hy is redelik uitgery en klipperig, kan nie te vinnig ry nie. Die GPS se tyd is nog op 16:30 as tyd van aankoms en ek is tevrede. Die laaste sowat 40 km tot voor Windhoek se lughawe is n lekker stuk pad en ons tel spoed op tot so 90 km/uur. Oor die radio spot Carol, sê Moeksie het nou goeie rede om te gaan inkopies doen, Swakop het mos mooi klerewinkels.

Dis net voor half vyf as ons by die kantoor van Alte Brücke instap. Ek is verbaas as die vrou sê daar is heelwat staanplekke beskikbaar, ten spyte van die feit dat dit Namibiese skoolvakansie is. Ons betaal vir drie nagte ek gaan soek vir ons staanplekke uit, sal haar kom sê as ons klaar gekies het. Ons kry twee staanplekke langs mekaar en skrop nes. Net voor ses is ons opgeslaan en nou kan ons ontspan. Moeksie doen ondersoek en sê daar is net drie kledingstukke weg, die reënbaadjie, n wit toppie en n swart langbroek. Ons is gelukkig !

Ons het al baie hier gekamp, altyd my eerste keuse in die omgewing. Elke staanplek het sy eie ruim badkamer, opwas en netjiese ingeboude braai. Daarmee saam maak die netjiese gras waarop jy kamp dit 5 ster !

Dis as Ewald en Carol langer as gewoonlik vat om nes te skrop dat hy my wys van die stof probleem. Sy karavaan het BAIE stof ingekry en Carol moet als eers skoonmaak. Die stof het onder by die vloer ingekom, sal more verder ondersoek instel. Gelukkig is ons drie nagte hier, genoeg tyd om running repairs te kan doen. Maandag is wel n vakansiedag, maar ons hoop ons sal alles kry wat nodig is vir die running repairs. Anders slaap ons maar nog n aand oor en kry wat nodig is Dinsdag, kan eers Woensdag ook ry.

Dis kwart oor ses as die son sy kop agter die palmboom begin wegsteek en ons rustig sit en ontspan, bly ons het hier plek gekry vir drie nagte. Die vuur kan aangesteek word, die laaste van die Namgate sosaties word vanaand gebraai. Die varsgebakte broodjie van Carol saam met tjips is koningskos en ek is spyt ons het nie meer sosaties gekoop nie.

Die pad vandag het sy tol geëis en almal is moeg. Ons bespreek more se program, net lekker in die dorp gaan rondloop en dalk laatmiddag n drankie drink by Tiger Reef hier onderkant die kampplek.

Dis as ek na n lekker stort langs Moeksie kom inkruip wat ek besef hoe gelukkig ons is, baie meer van haar klere kon verloor het. Daar het op n vorige toer drie van die bakkie se canopy knippe ook gebreek, moes te styf gestel gewees het.

Sondag 1 Mei 2022

Ons almal lê bietjie in vanoggend, n rustige dag wat voorlê. Na brunch klim ons almal in my bakkie en ry dorp toe. Woermann Brock is ons eerste stop. Ons stap deur die winkel en kyk wat is op die rakke. Ons moet voor ons van hier af verder ry vir ses dae aankope doen. Sal later ook by Spar n draai gaan maak.

Die dorp is besonder stil, so vroeg oggend. Dit seker te danke aan die feit dat dit boonop n vakansiedag is. Swakopmund is bekend vir sy kleurvolle geboue en ek neem n paar fotos terwyl ons deur die strate en winkeltjies drentel.

Ons maak n draai by Spar en besluit om more hier te kom aanvul. Ek het Google geraadpleeg  oor moontlike plekke waar ek nuwe knippe vir die laai kan koop en ons ry by hulle om. Almal natuurlik toe, dis Sondag en n vakansiedag maar ek merk hulle op my GPS, sal more kom kyk.

Terug by die kamp doen ons verder ondersoek op Ewald se karavaan om die stof lekkasie op te spoor. Dis as ek onder die karavaan lê dat ek opmerk daar is gaatjies waar moontlik skroewe moet inkom om die vloer te stut. Nie een het n skoef in nie. Sal more gou gaan skroewe koop en insit. Van die pop rivits op die vloer binne die karavaan is ook gedaan, sal moet uitboor en nuwes kry. Ek bel later vir vriend Gerrie Beyleveld wat hier in Swakop bly en sê ons kamp hier, moet reël dat ons by mekaar uitkom.

Dis net voor ses as ons afstap na Tiger Reef Beach Bar net hier onder langs die see. n Baie lekker eetplek en die sonsondergange van hier af is besonders. Ons gaan net n sundowner drink en terugstap, ons braai weer vanaand.

Ons is net terug by die kamp toe vriend Gerrie en Petro by ons stop. Hulle wil saam braai, want ons het baie om oor te gesels, sê hy as hy die pakkie vleis uithaal.  Ons is al baie jare vriende, was baie jare gelede ook kollegas gewees voor hy bedank het en hom hier kom vestig het. Ek was al BAIE hier by hulle in Swakop en het al vriende en familie na hom verwys as hulle hier oorbly of deurry.

Met die gesels sê hy ons kan sy boor en rivit gun more kom haal vir die herstelwerk aan die karavaan se vloer. Ons kuier en braai lekker. n Groot voorreg om sulke vriende te hê wat altyd bereid is om hulp te verleen of raad te gee, al is jy n vreemdeling. Ons maak n afspraak om more aand hier by Tiger Reef te gaan eet, sal mekaar so ses uur daar ontmoet.

Perto, Carol, Ewald, Hollies, Moeksie, Gerrie

As Gerrie en Petro later die aand vertrek, is dit gou stort en in die bed. Dit het lekker koel geword. n Lekker rustige dag gewees en altyd lekker om ou vriende op te soek en toue op te tel.

Maandag 2 Mei 2022

Dis nog vroeg as ek en Ewald pad vat na Gerrie se huis om die gereedskap te kry vir die vloer se herstel. Soos altyd vertoef ons langer as beplan en ry eers by n hardeware om op pad terug kamp toe vir die skroefies.

Met die regte gereedskap gaan dit sommer vinnig om die rivits te vervang en ductape oor die lasplekke te plak. Die skroewe is in en Ewald is baie tevrede, glo die stof probleem is nou iets van die verlede. Die knipper wat ek by Gerrie geleen het kom handig te pas as Moeksie gou my en Ewald se hare sny.

Op vandag se program was die vloer se herstel, n besoek aan Walvisbaai en Duin 7 en dan sal tyd leer wat ons nog wil of kan doen. Ons ry eers Walvisbaai toe om na die flaminke te gaan kyk. Die wind waai en hulle is nie so naby aan die strand vir mooi fotos nie.

Ons gaan maak n draai by die Waterfront, maar besluit om nie iets te eet nie, loop net rond en besigtig. Ewald kry vir ons weer n plakker of twee in een van die klein winkeltjies. Hier is heelwat restuarante en ons het al by verskeie van hulle gekuier.

Na die Waterfront maak ons n draai by die groot Mall hier in Walvisbaai. Ons is net betyds, want meeste winkels maak vandag 16h00 toe. Ons besluit om nie weer by Duin 7 te gaan draai nie, was al baie daar en ry terug kamp toe. Jy kan sien dis n vakansiedag, die vissermanne staan bankvas en hoop vir daai grote om uit te kom. Die pad hier bly altyd vir my n bekoring, die kontras van water en woestyn weerskante van die pad.

Terug by die kamp is daar net genoeg tyd om reg te maak vir ons afspraak met Gerrie by Tiger Reef vir aandete. Ek hou van die plek, stap soontoe en terug, so ons kan maar bietjie fles vat sonder om bekommerd te wees oor bestuur.

Gerrie sit al en wag vir ons. Petro het nog n afspraak en sal later by ons aansluit. Ons kuier lekker en die wyn smaak ekstra lekker, moet die vriendskap wees wat die ekstra smaak gee.

Gerrie, Ewald, Carol, Hollies, Moeksie

Ek verskoon myself om net weer die son te groet, weer besonders vanaand.

Petro sluit later by ons aan en die kuier raak nog lekkerder. Na ete ry Gerrie en Petro na ons kampplek waar ons sy gereedskap in sy kar laai.

By die kamp bespreek ons more se program, ek gaan knippe soek en dan gaan ons ons laaste aankope by Spar en die slaghuis doen voor ons verder ry. Ons kan maar redelik laat wegkom, want die totale afstand is net sowat 170 km.

NOG ONDER KONSTRUKSIE – KOM LEES ASSEBLIEF LATER VERDER.