VOORWOORD
Ek was lanklaas in Namibië en Botswana en die beplanning het begin in 2021 om weer n draai te gaan maak. Ek het al BAIE (10 jaar agter mekaar elke Julie maand) toere gereël op in Suidelike Afrika, so vêr as Malawi en die Serengeti.
Aanvanklik sou dit net ek en Moeksie wees, maar vriend Roelof en Elmarie was by toe ek vir swaer Ben en Antoinette hulle 360 toer uitgewerk het terwyl ons by Yellow Sands gekamp het. Hy sê as ek weer so toer doen, gaan hulle saam. Vriend Ewald en Carol hoor ook daarvan en sê hulle gaan DEFNITIEF saam !!
As daar n groep saam toer, is dit altyd beter om vooraf al die plekke te bespreek – kan nie met n groep by n plek aankom en hulle het nie vir jou plek nie. Ek praat met Roelof en Ewald en verduidelik dat ek niks vooraf gaan bespreek nie, gaan net ry en kyk waar kry ek plek. Ewald en Carol het al n paar maal saam met my getoer en hy sê dis reg. Roelof was al in Namibië en Botswana en hy sê hy verkies dit so. Hulle is reg om in die veld te slaap as dit moet.
Ek werk n roete uit, begin by Canyon Roadhouse in die Suide, op tot in Etosha, deur die Caprivi Kasane toe en dan terug Johannesburg toe. Ewald en Roelof is ingenome met die roete en moontlike kampplekke.
Dis Maart 2022 en ons kamp by Van Zyl’s Rus in Kuilsrivier vir 2 weke. Ons kamp met die waentjie, die karavaan staan by n vriend van my in Johannesburg. Wou nie weer terugry van die Kaap af Johannesburg toe om die waentjie en karavaan te ruil vir die toer nie. Sal van hier af teen die Weskus op toer tot in Springbok waar Ewald en Carol by ons sal aansluit. Roelof en Elmarie sal ons by Canyon Roadhouse kry, hulle kom van Ariamsvlei se kant af in en wil eers n draai by Ais Ais maak, was nog nie daar nie.
My selfoon lui. Aan Roelof se stem kan ek hoor daar is fout. Hy kan nie meer saamgaan nie, moet die volgende week gaan vir n knie vervanging en die dokter sê hy sal nie mobiel wees vir die volgende 2 maande nie. Ek kan hoor hy is baie teleurgesteld.
Donderdag 21 April 2022
Dis net voor 12:00 as ons by Springbok karavaanpark aankom. Ons het gisteraand by vriend Erwin en Juanita by Sir Lamberts gastehuis oornag en die pad hierheen het vinnig gegaan. Ons ken die kampplek goed, al baie hier kom oornag. Ek en Moeksie slaan op en gaan doen ons laaste aankopies voor ons more oor die grens gaan.
Dis nogal n uitdaging want jy mag geen vleis, groente, vrugte, eiers, meel en baie ander goed oor die grens vat nie. Ons het op ons roete hierheen besluit dat ons ten minste twee etes se vleis sal gaarmaak wat jy dan wel oor die grens mag vat. Ons het met Ewald en Carol gereel dat ons kosbeurte maak. Jy koop wat jy gaan maak en hou die strokies sodat ons die koste later kan deel.
Dis net na drie as Ewald en Carol die park inry. Hulle het gisteraand by Groenriviermond oorgeslaap. Hulle was klaar in die dorp en hulle aankopies is afgehandel. Ewald ry met n Landrover Discovery en sleep n Conqueror Commander off-road karavaan. Ek ry met n Hilux 4L V6 en sleep my Venter Bush Baby waentjie wat ek oor baie jare verander het soos ek hom wou hê.
Voor ek iets kon sê oor vanaand se ete, bring Ewald n lekker ribbietjie te voorskyn, dis wat vanaand geëet gaan word, maar ek moet hom braai. My ribstaander het nie saamgekom nie, maar met so rib maak jy gou n plan. Dis al redelik laat vir die rib, braai hom gewoonlik so drie ure, maar ek sal hom maar bietjie “jaag”, dit kan koud word hier op Springbok !
Ons smul lekker aan die rib en bespreek die toer wat voorlê. Jy kan die opgewondenheid in ons stemme hoor as ons die roete en kapmpplekke bespreek. More wil ek nie te laat ry nie, gaan by Vioolsdrif oor die grens en n grenspos is soos n lucky packet, weet nooit wat wag vir jou nie. Gelukkig ry ons nie vêr nie, slaap op n plaas net voor Grunau.
Dit neem n tydjie voor ek aan die slaap raak, die opgewondenheid is groot.
Klik op “PREVIOUS POST” om volgende dag te lees.