Dag 5

Maandag 25 April 2022

ROETE : C37, C12, B4, Keetmanshoop, C17 Mesosaurus = 185 km

Ons is vroeg op en na my tweede koppie koffie begin ons met mening afslaan. Die eerste 100 km is grondpad, dan teerpad (34 km) tot in Keetmanshoop waar ons n paar aankopies gaan doen en die res (44 km) weer grondpad.

Dis net voor nege as ons by Canyon Roadhouse uitry. Die grondpad tot by die B4 is goed en ons vorder vinnig. Ons stop by Spar in Keetmanshoop om n paar goedjies te koop, kom more weer hier verby en sal dan groot aanvul. Ons is verbaas oor die groente se prys, onbetaalbaar. Ek weet dit eintlik uit vorige ondervinding, maar dis rof. Dit word vêr aangery hierheen en die hoë dieselprys help nie veel nie.

Ons vat die pad en die GPS vat ons verby die Kokerboomwoud – plek waar ons al verskeie kere oornag het. Die bordjie aan die linkerkant, 30 km verder, kondig ons bestemming aan. Dis half twee as ons inry tot by die huis hier voor ons en ons kom voor dooiemansdeur te staan. Daar is n selfoon nommer op die deur wat jy kan bel, maar dit gaan nie werk nie, hier is nie selfoon opvangs nie !

Aan die oorkant van die pad is daar n huis en ek sien die honde wat staan en blaf. Ek ry soontoe maar die hek is gesluit. Na n paar keer toeter blaas sonder sukses, ry ek terug en sê vir Ewald ons gaan die kans vat en met die tweespoor paadjie aanry in die rigting wat die kampplekbordjie wys. Die ander opsie is om terug te ry en by Kokerboomwoud te gaan kamp, maar daai voorstel word gou by die venster uitgegooi.

Ons vat die tweespoor paadjie Noord en ry deur die eerste hek. Na ongeveer 2 km moet Moeksie weer hek oopmaak. Die paadjie is lekker sanderig en ons ry by n boom verby met n bordjie wat aandui dis n kampplek. Ons ry nog verder en is later in n droë rivierloop. As die sink geboutjie voor ons verskyn neem ek aan dis n ablusie en hier is n groot doringboom voor ons. Hier gaan ons lekker kamp !! n Ent verder in die rivierloop op is daar n huurvoertuig met n daktent op, n jong paartjie van die buiteland wat daar kamp.

Dis net na drie as die kamp staan. Die ablusie is n sink gebou wat met n draadheining afgekamp is, seker vir die diere wat hier rondloop. Hier is springbokke, gemsbokke, skaap en bees op die plaas. Die ablusie het lopende water, n stort en n spoeltoilet vir mans en dames. Hier is nie krag nie, so die sonpanele word uitgesit. Ons word omring deur honderde kokerbome en die rotsstapels lyk net soos die by die  Speelplek van die Reuse. Ek weet sommer hier gaan weer BAIE fotos geneem word met sonsondergang.

Ons maak “sitkamer” in die koelte van die groot ou boom, maak net seker ons sit nie reg onder die groot versamelvoëlnes hier bo ons nie. Slange hou mos ook van hierdie neste, lekker baie kos vir hulle in die nessies.

Net na 4 stop oom Giel Steenkamp hier by ons. Hy is die eienaar en kom net seker maak ons is ingeburger. Ons betaal vir die aand se kamp en hy vra of ons op n toer wil gaan om na die fosiele te gaan kyk voor ons ry more. Dit is eintlik waarvoor hierdie plek bekend is, die Mesosaurus fosiele, Duitse soldate se grafte, die dolomiet rotsformasies en die kokerbome. Hier is ook verskeie staproetes en lekker tweespoor paadjies wat jy op jou eie kan ry.  Tyd gaan dit nie toelaat nie en en ons sal n volgende keer verseker langer hier kuier. Sy seun stop ook en kom groet vriendelik.

Ons gaan stap n ent en verkyk onsself aan die kokerbome en die rotsformasies, rêrig iets besonders. Nou is ek eers bly ons het nie teruggedraai Kokerboomwoud toe nie, dit n mooi plek die ! Ek sal laaaaank hier kan wegkruip, hier onder die ou groot doringboom. Hier kom nog n huurvoertuig aan met n daktent. Hy ry eers verby ons, op met die rivierloop, maar kom later terug en slaan op langs die ablusie reg oorkant ons. Ouerige couple van Duitsland.

As die son nader aan die horison beweeg is ek en Ewald met ons kameras en selfone die veld in, hier kan dalk mooi kodak moments kom. Moet sê, my selfoon neem amper beter foto’s van sonsondergange as my kamera.

Dis ons beurt om kos te maak en die tjops wat ons by Namgate gekoop het, is die regte item op die spyskaart. Dit koel lekker af as die son wegraak en ons sit nader aan die vuur. As ek die laaste stukkie vleis van die been afeet weet ek, ons moes baie meer hiervan gekoop het, dis besonder sag en smaaklik.

Ons kuier tot redelik laat buite as ons die dag se ervaringe deel en more se roete bespreek. Ewald en Carol wil deurry Luderitz toe en een aand daar gaan oorslaap. Die weervoorspelling sê hulle moet nie gaan kamp nie (die wind gaan erg waai en Shark Island is die enigste kampplek – die wind het al tente geskeur toe ons daar was met n vorige toer). Hulle gaan kyk of hulle nie die karavaan in Aus iewers kan los nie en sal in n gastehuis oorslaap op Luderitz. Ons gaan by Tirool kamp, so 50 km Noord van Aus op die C13, waar hulle weer by ons sal aansluit oor twee dae. Ons was al baie op Luderitz en het al verskeie kere gesien wat daar te siene is, gaan hom skip hierdie keer.

Ek lê lank wakker en bepeins die dag se gebeure, die omgewing en ons ervaringe – dis groot genade dat ons dit kan beleef.